وليت قمت لميت هاك الياقوت الكل في تركينة-لا نكسب لا صندوق لا شكارة-وحبيت نشوف منين صب ها الخير الكل-توه السقف محلول وفيه نقبة تعدي بنادم- عاودت نصبت الصرافة و طلعت. طليت. نلقى السقف فوقو سقف اخر وثمة تراكن ومقاصر والجوهر والزمرد واليقوت اكثرمن هاك اللي طاح في القاعه.هزيت وحيده بعتها.صلحت الدار وبيضت ودهنت وهبطت الموبيليه.سمعوا الجماعه جاوني-نلقاهم قاعدين لي في السقيفه على صفين كيف طلاب سيدي محرز- عيطت للخادم قلت لها خرج لهم فاضل العشاء وعطيتهم كل واحد ريال .خرجوا حاشاك حاشاك.ايا عبيت هاك الخيرات في بيت وقعدت نحسب.لقيت لو كان نعيش ماية سنه اخرى كيف كل نهار نبيع ياقوته واحده ونصرف حقها ما نوفاش الربع.قلت هاك الجماعه اصحابي ما راوليش بالخير وماعملوش معايا المليح لو كان نخزيهم ونبعث لهم كل واحد صاع ياقوت. ومنها قلت لا.في التراب ولا في كروش اولاد الكلاب.ووليت كل نهار نخرج ياقوته للسوق. اخر سوم نهرسها في المهراس و نرميها في التراب-وهم يغزلوا- هذي هي قصتي يا خويا.قاللو استنى الساعه.دخل للدار جابلو ثلاثه صيعان من هاك المحبوب وقال لو خوذ باش تنور على نفسك ليلة العرس وباش انسابك ما يحقروكش وما يوطيوش فيك العين.هز هاك العوين وشد الثنيه راجع للحداد باش يحكيلو القصه العجيبه ويسمع منو... تو ما عادش ماشي على ساقيه.عندو المال شرى كيف ما تقول انت اثنينه من الخيل ووصيف.ركب الوصيف على حصان وعبى لو المونه .صب هاك الثلاثه صيعان في الخرج متاعو وندهوا.المسافه اللي عملها في المشي على ساقيه في ثلاثه اشهر عملها في جمعتين.وصل لمدينة البصره مقابله لحانوت الحداد.السلام عليكم وعليكم السلام.استنى قالو.دخل يجري لقاع الحانوت ومنها خرج قال لو اه جبتلي حكاية اللي يهرس في الياقوت.قال لو اي نعم.ايا حل لي وذنيك واتصنت المعاني واصغي لكل فن. وحكى لو القصه بالتمام.تعجب سي الحداد من ها القصه الغريبه في بابها وقالو ايا يا سيدي نحكيلك على قصتي.ووعد الحر دين وانا كيف وعدتك ما نخالفش.انا صنعتي حداد كيف ما تشوف.صنعة بابا وجدي.وباش صنايعي وامين الحدادين في ها البلاد.عندي هاك المقصوره في الحانوت نهار دخلتلها.فيها شباك.نشوف في حمامه راكسه على هاك الشباك.هاك الحمامه فيها الوان عجيبه تخطف الانظار.لا عرفت لا جوهر لا ذهب لاياقوت.عجبتني حبيت نشدها.لكن انا شديتها وهي طارت بي.وشوف قدرة ربي.هاك الشبيبك شوف قداش ضيق.خرجت منو.غمضت عيني وقلت فين ترسي بر السلام.ماعرفت اداني النوم ما عرفت دخت ماعرفت قداش قعدت تطير بي.اما حسيت ركزه حليت عيني.نلقى نفسي قدام بلاد ما نعرفهاش.الحال صباح.باب البلاد مسكر.قعدت حاير في امري.ياخي انا هكايه والباب تحل. والطامه والعامه خرجت.ناس كبار لابسين لباسات بكلهم ذهب.وسيوف.وعسكر على الخيل وموزيكه وسناجق تذري.من حينهم ترماوا في القاعه-ساجدين قدامي-.قعدت باهت ومتعجب في امرهم.اش بيهم هذومه مهبله.مجانين.اش توتى عليهم.ياخي تقدمت كروسه-مربوطين فيها سته من الخيل-هزوني-يد و ساق-وصبوني في وسطها.على خيلهم قدام الكروسه ووراها وعلى اليمين وعلى اليسار.والسناجق تذري والموزيكه تضرب والطبل يرزم.والنساء علىالسطوحات تزغرت.وانا فمي طاقه.وعيني علاقه.ودورت الكروسه داخله للبلاد ونقولزعمه هذا منام والا يقظه.حتى وصلوا بي سرايا.عسكر واقفين ضربواالسلام.هبطوني.دخلوني.مقابله للحمام تمكنوا بي نصف طزينه طيابه.يد يد.ساق ساق.كنت اكحل كيف الفرنانه-اش تعرف حداد-خرجوني فرخ سلاطين.وانا وجهي فيه الضوء كيف ما تشوف.الكونوليات والعطورات ما غاب منهم شىء.خرجوني من ثميكه.ضرب الزوز والفرد قالوا الله ينصر من صبح.بديت نعمل كيف بالنازله.....دخلوني لبيت كبيره.صف على اليمين وصف على اليسار من الكبارات.قاموا يتعايطوا الله ينصر من صبح.طلعوني اربع درجات قعدوني على كرسي ذهب.وتقدم الوزير عمل خطبه ومنها جاو الشعراء-كل واحد تكلم قصيده-تقدم الوزير شكر الناس الكل-وخرجوا-قال دخلوا العدول.دخلوا زوز عدول.قال لهم ايا اكتبوا صداق سيدنا على الاميره.كتبوا الصداق وباسوا لي يدي وخرجوا وخرج الوزير.دخل وصيف راسو قد المطبق وشاكريه معلقه في حزامو وفي جرتو جماعه وصفان حلوا باب على فردتين وقال الزميم متاعهم بعدوا السلطان داخل.وتقدموا هبطوني وضربوا الصف.ودخلت لدار الحريم.عواده تضرب وبنات فانيدات تتشاطح.ضربوا العصمليه وقام الزغاريت.زوز كراسي منصوبين قعدوني على كرسي وخرجوا واحده شابه.واحده شابه يا خويا-ضم رقتك قل لو-قل لو ايه. يا خويا كيف نتفكر...ايا سيدي قعدوها بحذايا-والعواده تضرب وانا نخزرلها من تحت لتحت ونتوحد للباري-ايا شخنا عملنا كيف.وفات العواده قمت دخلت انا وعروستي.سكرت باب البيت وصليت ركعتين.ومنها قلت لها اجى يا للا.احكيلي اشنيه ها النازله.راني ما فهمت شي...ياخي شفتوني براني حبيتوا تعديوا علي وقيت.والا هذايا الكل بالحق.قالت لي هذاكه سبر بلادنا.وقت اللي السلطان يموت.يخرجوا لباب البلاد.على الصباح.اللي يجي داخل الاولاني يحطوه سلطان في بقعتو.وياخذ مرة السلطان اللي مات.ايا قلت كيف هكايه مليح.والحمد لله جيت انا وما جاش غيري.وهاك الحمامه اللي طارت بي لازم هذاكه مكتوبي.ووليت لك في جنس خلاعه ورياقه-واحد موش مستانس ولقى شىء اللي ما كانش يحلم بيه في المنام-وليت سلطان نضرب نصرع.طلع  الشهر صحيح على المليكه حبلت.جابت وليد...ما عمل هاك الولد عامين الا ما زادت حبلت جابت بنيه.زادت حبلت جابت وليد اخر.ولاوا عندي زوز اولاد وطفله.هاو نهار انا نصطاد.وتعديت على بستان.طليت من الطابيه نشوف في جنس طفله قد مانوصف لك وشويه.هذيكه اللي يقولوا شقت السماء وهبطت.نشدت على هاك السانيه لشكون قالولي للوزيرفي نهارتها بعثت عيطت للوزير وخطبتو في بنتو .فرح هاك الوزير وتخلخل.قال لي انا عندي بنات مع سيدنا.هذيكه خديمتك.ايا بدينا نحركوا في العرس.سمعت المليكه قالت لي تي بلحق خطبت بنت الوزير.قلتلها اي اش بيه.الشرع محلل اربعه.قالتلي ما تحياش وماكش ولد اصل وماتراش بالخير.قلتلها لا هو الخير عملتو في انت.ماهي عاده في بلادكم.طلعتها معايا راس بحر-انا كلمه وهي كلمه-ياخي تشرع في طابقها وتلصقلي بكف-البرق لعج ما بين عينيه-وخرجت مقبطره.قلت اه يحييني قدري وزماني انا السلطان ومرا تعطيني كف.وقعدت مغشش ونتكمر وحدي ونخمم كيفاش نعمللها-نحكم عليها بالموت.نشنقها نقصلها راسها.نطلقها.نهبطها لدار الخدم...-ياخي انا هكايه والحمامه جات ركزت على الشباك.نسيت كل شي وحبيت نشدها .انا شديتها وهي طارت بي.غمضت عيني حليتهم.نلقى نفسي في الحوينته كيف العاده والعوايد ولابس ها الملوطه الزرقاء ها المسخه بالفحم.اللي كنت لابسها المره الاولى...وقعدت لاني بملكي.لاني بمرتي لاني بوليداتي و كانو ما كانش...لكن قلت اشكون يعرف...لعل وعسى.بالك ربي يسخف علي القلوب وتجي الحمامه ترجعني لبقعتي.لمريتي ووليداتي ولمحكمتي.وبديت نعاهد في ربي اللي ما ناخذش بنت الوزير.ومرتي الالى لا نبدل لا نغير فيها.وقعدت نضرب ضربه ونجي في قاع الحنوت.بالك نلقى الحمامه جات.وهاني توه قداش من عام فيها المعدل والحمامه ما ملهاش ضحيح.وتقطع الرجاء يا عظيم الرجاء.قالو تعرفشي ندبر عليك.نحي ها الهدره من بالك وانساها راهي الحمامه محال باش ما زالت ترجعلك.الدنيا راهي ما تجي الا مره واحده.هذاكه ربي حب يختبرك ياخي طلعت طماع.والشبع يبعبع يا خويا.برشه ناس كيفكاللي تزوجوا فقراء وغناهم ربي.وغلات الشربه في روسهم وهاك اللي استغناو على خجلتها ما عادتش تهجيهم ياخي لا صحلهم لامن الكرفه لامن الصافي.قوم اخدم على نفسك ونحي ها الهدره من بالك واحمد ربي اللي حي وبعقلك.لاتسيب من يدك ولا تندم على ما فات...وعاش من عرف قدرو.ايا بخاطرك يا خويا وربي يصبرك.وركب هو ووصيفو راجع لبغداد باش يحكي ها الحكايه للراجل اللي يبيع في الجوز بضرب الكف ويسمع قصتو.